Antondegi Berdeak pozik hartu du Antondegiko olatu artifizialaren proiektua bertan behera geratu izana eta muinoaren babesa

Donostiako Udalak Antondegi muinoan olatu artifizialen igerileku bat eraikitzeko asmoa aurkeztu zuenean, proiektua alde askotatik kaltegarria zela irizten zuten talde ugari mugiarazi zituen: ekologistak, kontserbazionistak, auzo-elkarteak, surflarien kolektiboak,eta abar. Haien ustez, erabat arduragabea zen, eta jasangarritasun irizpideen kontrakoa, 6 hektareako (6 futbol zelaien tamainako) olatu artifizialen azpiegitura bat eraiki nahi izatea, balio ekologiko handiko Antondegi muinoa txikituz, handik 4 kilometrotara olatuak egonda. Taldeek batu eta Antondegi Berdea kolektiboa sortu zuten, herritarrei proiektua zergatik ez zen hiriarentzat ona azaltzeko helburua zuten hainbat ekimen koordinatu eta antolatzeko: informazio-kanpainak, Antondegiren biodibertsitateari buruzko dibulgazioa, sinadura bilketa, ingurumen inpaktuari buruzko txostenak, administrazioarekin elkarlana, surflarien mobilizazioa, kaleko protestak eta abar. Horregatik, Donostiako Udalak iragarri berri duenean Antondegin ez dela olatu artifizialen proiektua egingo eta muinoa eremu urbanizaezintzat joko duela bere balio naturalengatik eta korridore ekologiko gisa betetzen duen funtzioagatik, oso positibotzat jo du erabakia kolektiboak. Eta sorrerako helburuak lortuta, Antondegi Berdea kolektiboak bere bizi-zikloa ixten duela iragartzen du, bere ibilbidearen balorazio oso positiboa eginez, eta kolektiboaren inguruan hainbeste jendek egindako lan altruista eskertuz eta txalotuz.

Joan den maiatzaren 17an jakitera eman zen, egunkari batera egindako filtrazio baten bidez, Donostiako udal gobernuak, HAPO berriaren esparruan, Antondegiko muinoa landa-eremu gisa sailkatzearen aldeko apustu sendoa egingo duela. Erabaki horrek 2020ko amaieran iragarritako olatu artifizialen igerilekua eraikitzeko proiektua bertan behera uztea dakar.

Olatu artifizialarena zen Antondegi eremurako Udalak zuen proiektu aktibo bakarra. Hiru mila etxebizitza eraikitzeko proiektu bat egon zen aurretik, baina urte batzuk geroago blokeatua zegoen Donostialdeko 2016ko Lurralde Plan Partzialaren bidez. Proiektuaren funtsa zen Wavegardenek Aizarnazabalen duen instalazioa Antondegi muinoan birlokalizatzea, non eta udalerrian urbanizatu gabe eta balio ekologiko handia duen muino bakarrenetako batean. Udal gobernuak aurreratu zuen informazioaren arabera, Antondegin olatuen igerilekua eraikitzeak 6 hektareako urbanizazioa ekarriko zuen (6 futbol zelaien tamaina baino handiagokoa) muinoaren gainaldean, eta ibilgailuentzako sarbide berriak ere eraiki behar zituzten.

Udalak proiektuaren berri eman zuenean, talde asko mobilizatu ziren (ekologistak, kontserbazionistak, auzo-elkarteak, surflarien kolektiboak, baserritarrak, etab.), proiektua hainbat aldetatik kaltegarria zela salatuz. Horrela sortu zen Antondegi Berdea kolektiboa, herritarrei Udalak proposatutako proiektua hiriarentzat positiboa ez zela ikusarazteko hainbat ekimen koordinatu eta antolatzeko helburuarekin.

Antondegi Berdeak Antondegiko olatu artifizialaren proiektuaren inguruan honako alderdi negatibo hauek 2 nabarmendu zituen, besteak beste:

  • Donostiako korridore ekologikoen sarea degradatzea.
  • Landazabal atlantiko ekosistema egoera onean mantentzen duen Donostiakoeremu urrietako baten degradazioa.
  • Eragin negatiboa hainbat animalia-espezietan, horietako 27 Espezie Mehatxatuen Euskadiko Katalogoan jasotakoak izanda.
  • Jasangarria ez den eta natura-ingurunea zaintzearekin bateraezina ez den hirigintza-garapena bultzatzea.
  • Elikagaiak hurbil ekoizteko nekazaritzako lurzorua suntsitzea, eta egoera onean dagoen landa-eremua kaltetzea.
  • Surflarien eskaerari ez erantzutea, gure hondartzetako masifikazioa handitzea eta hiriaren turistifikazio-prozesua areagotzea.

Laburbilduz, erabat arduragabea eta iraunkortasun logikaz kanpokoa iruditzen zitzaigun 6 hektareako olatu artifizialen azpiegitura bat eraikitzea (6 futbol zelaien tamainakoa), Antondegi bezalako balio ekologiko handiko muino bat txikituz, 4 kilometrora olatu naturalak daudenean. Eragin ekologiko handia zuen, ez zien interes sozialei erantzuten, eta ez zen inolaz ere baiezko bat Donostiaren aurrerapenari, aurrerabideari eta etorkizunari.

Xabier Saralegi Itsas Enara Ornitologia Elkarteko bazkide eta Antondegi Berdea kolektiboko kidearen adierazpenen arabera, “oso positibotzat jotzen dugu Antondegin olatu-igerilekuaren eraikuntza bertan behera uzteko eta muinoa eremu urbanizaezin izendatzeko Udalak iragarritako erabakia, bere balio naturalengatik eta korridore ekologiko gisa eremu horrek betetzen duen funtzioagatik”.

Poztu egiten gara Udalak iritzia aldatu izanaz, baina, aldi berean, gogorarazi behar dugu Udalak behin eta berriz uko egin ziola gure kolektiboarekin hitz egiteari, eta ingurumenarekin lotutako alderdietan oso zorrotza ez den jarrera erakutsi zuela. Udalak baieztatzen zuen, besteak beste, proiektuak ingurumen-berme guztiak zituela, surfeko eragile guztien babesa zuela, eta, gainera, batzuetan argudio engainagarriak erabiltzen zituen, esanez -adibidez- hobe zela olatu artifiziala eraikitzea etxeak eraikitzea baino, ordurako LPPk 2016an etxebizitzak eraikitzeko proiektua blokeatua zuenean. Aurrekari horiek ikusita, kezka dugu ez ote duten saiakera egingo igerilekua beste eremu naturalen batean kokatzeko, haren funtzionamenduarekin lotutako alderdiak behar bezala jorratu gabe, hala nola uraren eta energiaren kontsumoa eta abar.

Udalaren argudio faltsuei kontra egitea ez da lan erraza izan. Gure kolektiboak ahalegin handia egin du Antondegiren biodibertsitateari buruzko informazio- eta dibulgazio-kanpainetan, sinadura-bilketan, ingurumen-inpaktuari buruzko txostenak egiten, administrazioarekin lan egiten, surflarien mobilizazioan, kaleko protestatan eta abarretan. Lan eta jarduera horietan herritar eta kolektibo askok hartu du parte hartu, Donostiako gizartearen espiritu demokratiko, kritiko eta eraikitzailearen osasun ona erakutsiz.

Azkenean, defendatu genituen postulatuak nagusitu dira, eta olatu artifizialen
igerilekua ez da Antondegiko muinoan eraikiko. Gainera, eremu hori bere balio ekologikoengatik babestu egingo da. Hortaz, kolektibo honen sorrerako helburuak lortuta, gure bizi-zikloa itxiko dugula iragartzen dugu, gure ibilbidearen balantze oso positiboa eginez.

Amaitzeko, Jabi Iraizoz Donostiako surflari eta Antondegi Berdeko kidearen
adierazpenak jaso nahi ditugu: “Modu batera edo bestera kolektibo honetan parte hartu duten pertsona askoren lan altruista eskertu nahi genuke: surflarien kolektiboa, talde ekologistak, bizilagunak, baserritarrak, talde kontserbatzaileak, esparru akademikoko ikertzaileak eta gure jardueretan parte hartu eta lagundu diguten pertsona guztiak”.

Antondegi Berdea:

Surfrider Foundation Europe – Eguzki – Fridays for future – Haritzalde – Parkea Bizirik – Itsas Enara Ornitologia Elkartea – BiziLagunEkin

Guggenheim Urdaibai Stop! – Eider Gotxiren hitzaldia

Pasa den maiatzaren 27an Okendo Kultur Etxean Guggenheim Urdaibai Stop plataformako Eider Gotxiren hitzaldia antolatu genuen Satorralaia, Haritzalde, Ekologistak Martxan eta Bizilagunekin plataformak.

Hitzaldi interesgarria, informazio eta datuz ongi dokumentatua eta argigarria izan zen. Donostian ongi ezagutzen ditugun praktika diruzaleak eta suntsitzaileak identifikatu ahal izan genituen Guggenheim Urdaibai proiektuaren inguruan gertatzen ari denaren berri izatean.

Plataformako kideen lan zorrotza eta indarra dira Urdaibaiko ingurunearen etorkizun sozial, ekonomiko eta ekologikorako itxaropena.

Jarraian ikusgai hitzaldiaren bideoa eta hizlariak erabilitako aurkezpena:

DONOSTIA DEFENDATUZ HERRITARRON PLAZA

Egun osoan zehar herri mugimenduen erakusketa. informazio gunea, performancea eta hiri-ereduaren maparen osaketa auzolanean.

2024/04/27. Boulevard. Donostia.

PROGRAMA:

12:00 Mahai-ingurua HIRI-PARKEAK (Haritzalde)

12:45 Mahai-ingurua TURISTIFIKAZIOA (Bizilagunekin – Parte Zaharrean Bizi – Birunda)

13:30 Bertsolariak BEÑAT GAZTELUMENDI, UNAI GAZTELUMENDI ETA IZARNE ZELAIA

14:00 Bazkari autogestionatua. Ekarri pikatzeko zerbait!

16:15 Mahai-ingurua MUGIKORTASUNA (Kalapie – Satorralaia – Egia Bizirik)

17:00 Mahai-ingurua HARRERA EKIMEN SOLIDARIOAK (Kaleko Afari Solidarioak – Hiritarron Harrera Sarea – Guztiontzat Egia)

17:30 Kontzertua GARTXOT

18:00 Mahai-ingurua ONDAREA (Miren Apalategi – Josean Arrieta)

18:45 Mahai-ingurua ETXEBIZITZA (Stop Desahucios – Pasaiako Portuko Etxea/ Etxebizitza Sindikatua – Altza 21 Herri Ekimena – Saretxe – Javier Nadal)

20:00 Kalejira aldarrikatzailea. HIRI BIZIGARRIAREN ALDE!

MANIFESTUA:

Hiriko hainbat auzo-elkartek eta gizarte-mugimenduk osatzen duten Donostia Defendatuz koordinadorak adierazten du Donostiako egungo hiri-eredua gutxiengo baten onurara bideratuta dagoela; gehiengoaren bizi-baldintzak baztertuta geratzen dira sektore pribilegiatuenen mesedetan. Espekulazio, turismo eta luxuzko negozioen aldeko Udal Gobernuaren erabakiak bata bestearen atzetik hartzen dira, hiria turistifikazio prozesu basatian sartu, etxebizitza larrialdia areagotu, bizilagunak auzoetatik kanporatu, ondare arkitektoniko eta naturala suntsitu, berdeguneak murriztu, merkataritza txikia galdu eta hiriko sare soziokulturalari eragiten dion bitartean. Politika horien ondorioak gero eta larriagoak dira eta donostiar gehienek jasaten dituzte egunez egun. Gure hiria gero eta bizigaitzagoa da.

Ildo honetan, donostiarron beharrekin zerikusirik ez duten hainbat proiektu eta operazio urbanistiko bultzatzen eta inposatzen ari direla salatzen dugu, interes orokorrari eta herritarren ahotsari muzin eginda:

  • Basque Culinary Centerren bigarren eraikina eraikitzen hastea, Manteo parkea suntsituta. Inposaketa autoritario horri gehitzen zaio udal lurzoruaren ondare garrantzitsu bat unibertsitate pribatu bati lagatzea.
  • San Bartolome muinoan merkatal-gune erraldoia jartzeko proiektua, lurrazpiko 4 solairuko aparkalekuarekin.
  • Eraikin historiko esanguratsu eta bereizgarri (Arte Ederren Antzokia, Atotxako Geltokia eta abar) babesik gabe uztea eta eraistea.
  • Etxebizitza legean jasotako baldintzetan Donostia gune tentsionatu izendatzeko urratsik ez ematea. Funts putreak hiritik botatzeko neurririk ez hartzea.
  • Etxebizitza berrien eraikuntza sustatzean alokairu sozialaren eskaintza legezko gutxienekoetara mugatzea eta etxebizitza espekulatiboari lehentasuna ematea.
  • Etxebizitza-sustapen guztietan etxebizitza babestua sartzeko betebeharra sistematikoki ez betetzea eta Udalak dituen aprobetxamendu- edo eraikigarritasun-lagapenak diru bihurtzea.
  • Hotelen irekieraren sustapen neurrigabea, Nobu hotelaren arau hausteekin Udalaren konplizitatea, Basquepackers (Arriola kalea) hostelaren irregulartasunen ikuskapen eza, Koisi (Heriz) hostelak bizilagunei eragindako arazoen betikotzea.
  • Igeldon Xabi Alonsoren txaletaren kasuan trikimailu legalen bidez arauak hautsi dituen aldearekin Udala aktiboki lerrokatzea.
  • Belartzako landa gunearen berreskurapena agindu duten epaiak ez betetzea eta eremu hori betirako suntsitzea dakarten on line merkataritzako multinazionalentzako makro-poligono logistikoaren eta hotel berriaren Belartza2 izeneko egitasmoaren sustapena.
  • Añorga Txikin neurriz gaineko 250 etxebizitzaren eraikuntza, auzoan behar diren zerbitzuak eta azpiegiturak kontuan hartu gabe.
  • Altzako Auditz-Akular inguruko muino eta ibarbide naturalak 3.000 etxebizitza baino gehiagotarako lurzoru urbanizagarri gisa mantentzea, garapen iraunkorreko irizpide guztien aurka jardunez, eta gizarte eta lurralde aldetik orekatua den hirigintzaren aurka.
  • Otis multinazionalak Herreran dituen lurrak 400 etxebizitza baino gehiagotarako eremu urbanizagarri bihurtzeko asmoa, enpresaren interes ekonomiko hutsei erantzunez. Horrela, Altzako lanpostuen desertizazioa burura eraman eta auzoarentzako espazio librea lortzeko azken aukera galtzen da.
  • Alokairu turistikoko pisuen erregulazio ez-eraginkorra eta ikuskapenik eza. Egungo araudiaren aurreko pisu turistikoen kopurua gainditzea eta eremu saturatuenak are gehiago saturatzea ahalbidetu duen arauan tematzea.
  • Ostalaritzak eremu publikoa era zentzugabean okupatu eta pribatizatzea.
  • Donostiako hirigintza berrantolatu behar duen Plan Orokor berria arrazoirik gabe atzeratzea.
  • Metro-pasantearen proiektu zentzugabea bultzatzea, eta bide batez egitasmo horrek Dbus-en izango dituen ondorio kaltegarriak eta obrak eragin dituen diru-xahuketa, segurtasun-fallta eta espazio publikoari nahiz bizilagunei eragindako kalteak ezkutatzea.
  • Emisio Gutxiko Eremua kilometro karratu txiki batera mugatzea, eremu turistikoan. Hiriko trafikoa erabat baldintzatzen duten lurpeko aparkalekuak murrizteko neurririk ez hartzea.
  • Hirian hain urria den lurzoru naturala, berdeguneak eta zuhaitzak suntsitu eta artifizializatzea. Adibidez, sur-park proiektuak Antondegi inguruarentzat dakarren mehatxua.
  • Zuhaitzen Plan Zuzentzailea egiteko gardentasun falta eta atzerapen ulertezina, ale osasuntsuak mozten diren bitartean. Azken-aurrekoa, Errondo pasealekuan.
  • Hondakinen kudeaketa txarra, Donostiako hondakinen bereizketa-tasa Gipuzkoa osoko txarrena bihurtuz. Horri gehitu behar zaio Parte Zaharrean eta antzeko eremuetan sortutako kutsadura akustiko larria.
  • Bizilagunen eskariei jaramonik ez egitea, kasu oso sinpleetan ere, hala nola Lugaritzeko Luis Villasante parkea urbanizatzea edo Zarautz hiribidea eta Matia Fundazioa lotzen dituzten bi igogailu publiko martxan jartzean, zortzi hilabetez funtzionamendutik kanpo egon baitira.
  • Udalak kalean lo egin beharra duten pertsonentzat eta migratzaileentzat harrera egiteko baliabiderik ez jartzea eta La Sirena aterpetxea neguan ixtea.
  • Donostia mordaza-hiri bihurtzea, eredu honen aurka gauden gizarte-sektoreen eskubide zibil eta politikoak urratuz.

Donostia Defendatuzentzat, jarduera horiek guztiak Udal Gobernuaren politika etengabearen erakusgarri dira. Alegia, ez dira arazo puntualak, hirian dugun arazo orokor eta endemiko baten ondorio eta adibide, baizik. Aurrekontu publikoa eta udal erakundeak interes ekonomiko partikularren alde jartzen dira sistematikoki, eta horrek erakusten du Donostia modu arriskutsu eta atzeraezinean saldu nahi dutela.

Herritarren bizitzak erdigunean jarriko dituen hiri-ereduaren alde egiten dugu, eta ez dugu onartzen gure hiriarekin egiten ari dena, asko baitugu jokoan.

Donostia ez dago salgai!

Santa Klara uhartearen esplotazio turistikoari ez! Uhartea naturarentzat eta bere habientzat

Udaberria ate joka dabil eta Santa Klara uharteko itsas hegaztiak habiak egiteko prestatzen ari dira. 7-10 egun habia egiteko, 2-4 egun errunaldirako, 28-30 egun lurrean inkubatzeko eta 50 egun kumeak zaintzeko. Hala ere, udaberriarekin batera, Donostiako makinaria turistikoa ere martxan jartzen da. Beste behin, Santa Klara uhartea eta Hondalea Aste Santuan bisitatu ahal izango dira. Berriz ere, hiriko baliabide naturalak eta kulturalak sektore turistikoaren interes pribatuen esku jartzen dira.

Aurten ere, udal gobernuak, industria turistikoaren eskutik, bisita gidatuak antolatu ditu uharteko itsasargian kokatuta dagoen Hondalea-ra joateko. Martxoaren 28tik apirilaren 7ra bitartean, 5 bisita antolatu dituzte egunero, txanda bakoitzeko, 20 pertsona. Guztira 100 pertsona egunean eta 1.100 pertsona Aste Santuan eta Pazko astean. Bestalde, uhartearen inguruko merkataritza-ontziek gehienez 150 pertsonako edukiera dute, eta, beraz, Hondalea bisitatu gabe, egunero 750 pertsonak uhartea bisitatu ahal izango dute. Santa Klara uharteak gutxienez 6 babes-figura, bakarrik 5,4 hektareako hedadura ditu, eta flora eta faunako espezie babestuen etxea da. Beraz, industria turistikoak udaberrian egiten duen jarduera hau Donostiako ondare natural eta kolektiboaren kontserbazioaren aurkako eraso zuzena da.

Historian zehar, uharteko espazioa helezina izan da jendearentzat urte osoan zehar, uda garaian izan ezik. Horrek ahalbidetu du, hain zuzen ere, enklabe natural honen aberastasuna kontserbatzea. 2019an eta 2020an, Hondalea instalazio artistikoa ireki aurretik, Eguzki, Parkea Bizirik, Haritzalde eta Bizilagunekin kolektiboak Udalarekin bildu ziren, uharteko espazio turistikoa irekitzea hiriko ondare natural eta kulturalarentzat izango litzatekeen mehatxuari muga jartzeko. Bileretan, egutegiari, ordutegiari eta edukierari mugak jarri ziren mahai gainean, baita uharteko bisitei lotutako zerbitzuak eta azpiegiturak zabaltzeko muga ere. Gainera, hartutako konpromisoak erabilera eta kudeaketa plan batean jasota geratzea eskatu zen.

Jardueraren bigarren urtetik aurrera, udal arduradunek eta Hondalearen sustatzaileek ez zuten bere hitza bete, ohiko bisiten garaia urrira arte luzatuz, eta udazkenean bisita pribatuak egiteko aukera emanez. Iaz bide beretik jarraitu zuten, Aste Santuan Hondalea irekiz. Aurten, beste urrats bat emango da, aldez aurretik hitzordua hartzeko beharra ezabatuz. Beste urte batez, hartutako konpromisoak ez dira bete. Hasieratik salatu genuen obra inauguratzean Hondalea erabiltzeko irizpideak zehaztasunik gabe eta funtsik gabe aurkeztu zirela, eta, zoritxarrez, denborak arrazoia eman digu. Konpromezu guztietan hitza jan dute.

Gogoratu behar da 2023an, Hondalea ireki eta uhartearen esplotazio turistikoaren ondorioz, Ekologistak Martxan taldeak bandera beltza eman ziola Kontxako badiari, biodibertsitatea kontserbatzeko kudeaketa txarragatik.

Badira hamarkadak paradigma aldaketa bat iritsi dela jende gehienaren pentsamoldera; Naturaren errespetua, ezagutza eta kontserbazioa behar eta nahi dugun bizimoduaren zutabeak dira. Donostiarrek, turismo-industriaren poltsikoak irabazteko ondarea suntsitzeari utzi eta bizilagunen ongizateari begiratzen dion beste hiri-eredu bat eskatzean, paradigma-aldaketa horrekin bat egiten dute.

Horregatik guztiagatik, honako hau eskatzen dugu:

  • Udal gobernuak eta Hondalea sustatzen duen enpresak uharteko zerbitzu eta azpiegitura berrien egutegiari, edukierari, ordutegiari, eta handitze-mugari buruzko irizpideak betetzea, eta irizpide horiek nahitaez bete beharreko kudeaketa plan edo ordenantza batean jasota geratzea.
  • Uharteko natura babestea eta berreskuratzea, itsas hegaztien kolonietako habitat naturala babestea uharteko esplotazio turistikoaren aurretik jarriz.
  • Itsas hegaztiek habia egiten duten garaian uhartera bisita gidatuak bertan behera uztea.

Sinatzaileak:

Parkea Bizirik Kukulunbera, Bizilagunekin Plataforma, Haritzalde Naturzaleen Elkartea, Eguzki eta Ekologistak Martxan

Udalak Donostian hotel eta ostatu turistiko gehiago irekitzeko atea zabalik mantentzea erabaki du

Donostiako Udal Gobernuak hasierako onarpena eman dio ostatu erabilerei buruzko Hiri Antolamenduko Plan Orokorraren aldaketari eta hurrengo Udal Batzarrera eramango du behin-betiko onarpenaren erabakia. Aldaketa honekin ostatu eta establezimendu turistikoen (hotelak, pentsioak, apartamentu turistikoak, aterpetxeak, erabilera turistikoko etxebizitzak, erabilera turistikoko etxebizitzetako gelak, etab.) ezarpenari buruz urtebetez indarrean egon den moratoria beste bi urtez luzatuko du. Moratoria hori, saldu nahi izan denaren kontra, salbuespenez betea eta urria da. Erabaki antzua da, azken urteotan turistifikazioari eman zaion bultzada kontuan hartuta, sortutako kalteak leheneratzeko.

Plan Orokorrean txertatutako aldaketaren ostean, ostatu eta establezimendu berriak ireki daitezke Aiete / Miramon, Altza, Amara, Amara Berri, Añorga, Bidebieta, Egia, Igeldo, Intxaurrondo, Loiola, Martutene, Morlans, Loiolako Erribera, Txomin-Enea eta Zubietan bizitegi lurzati gisa izendatuta ez dauden eremuetan. Eta zirrikitu legalak utzi dituzte bizitegi eremuetan ere lizentziak baimentzeko.

Horrez gain, ondare arkitektoniko bezala katalogatutako eraikinak ostatu bihurtu ahal izango dira Udalak hala erabakitzen badu.

Aurrekoa gutxi balitz, lurzoru urbanizaezinean kanpinak, nekazalturismoak eta landetxeak zabaltzeko aukerak ere ohiko baldintzetan baimenduko ditu Udalak.

Bizilagunekin plataformatik presazkoa eta garrantzitsua iruditzen zaigu Donostia desazkunde turistikorantz bideratzeko trantsizioa abian jartzea. Ezinbestean hiri eredua aldatu behar da, donostiarrontzat bizigarria izango den baldintzetara eramango gaituzten neurri eraginkorrak hartuz.

  • Hirian hotel eta ostatu berriak zabaltzeko aukera oro itxi behar da. Turistifikazioaren arazoa hiriko zonalde zehatzera mugatua balitz bezala tratatzea arazoa areagotzea da. Hirian eskaintzen diren ostatu-plazak murrizteko prozesu planifikatua martxan jarri behar da.
  • Ondare arkitektonikoaren zaintzarako neurri bezala eraikin katalogatuak turismora bideratzea kontraesankorra da, besteak beste azken urteetan Nobu hotelaren eta Catalonia hotelaren eraikuntzan hiriko ondareari jakinaren gainean egindako kalteak gertatu izan direla ikusita.
  • Etxebizitza larrialdia bizi duen hirian erabilera turistikoko etxebizitzekin amaitzeko urratsak eman behar dira. Lizentzia murrizkorra eta iragankorra ezarri behar da trantsizio-neurri gisa, pisu turistikorik gabeko hiria izatera pasatzeko lehenbailehen.
  • Neurri solte, partzial eta estetikoetan oinarritutako politikekin amaitu behar da. Azken ikerketek erakutsi bezala, donostiarrak turistifikazioaren kezkatuta, zapuztuta eta erakundeetan konfiantza galduta daude. Arazoaren tamaina eta hedadura ezkutatzeari utzi eta hiri mailako elkarrizketa zabala bideratu behar da, hiri-eredu bizigarri baterantz bidea hartzeko.
  • Desazkunde turistikorantz neurriak atzeratzen diren heinean atzeraezinezko kalteak eragiten ari da turistifikazioa Donostian. Egoera honekin aberasten ari direnen boterea eta presioari donostiarron antolakuntza eta batasunarekin erantzungo diogu.

DONOSTIAKO UDALAREN HIRIGINTZA POLITIKA SALATZEKO MOBILIZAZIOETARA DEI EGITEN DU DONOSTIA DEFENDATUZ KOORDINADORAK

Hiriko hainbat auzo-elkartek eta gizarte-mugimenduk osatzen duten Donostia Defendatuz koordinadorak Udalaren azken hilabeteetako hainbat jarduera larri salatu nahi ditu. Hori dela eta, Udal gobernuko arduradunei jendaurreko agerraldi publikoa egin dezatela eskatu eta herritarrei datozen aste eta hilabeteetako mobilizazioetan parte hartzeko deia egiten diegu.

Donostiako gaur egungo hiri ereduak gutxiengo batzuei mesede egitea du norabidetzat; gehiengoaren bizi baldintzak, ordea, zenbait sektore pribilegiaturen etekinen arabera gibelatzen dira. Udal Gobernuak espekulazioarekin, turismoarekin eta luxuarekin negozioa egiten duten jardueren alde  hartutako erabakiak bata bestearen atzetik datoz, hiria turistifikazio prozesu basatian murgilduz, etxebizitza larrialdia areagotuz eta herritarrak beren auzoetatik kanporatuz, hiriko ondare arkitektonikoa eta naturala deseginez, gune berdeak txikituz, merkataritza txikia itoz, eta hiriko ehun soziokulturala galduz. Politika horren ondorioak gero eta larriagoak dira eta donostiarron gehiengoak pairatzen ditu egunero-egunero.  Gure hiria gero eta bizi-ezinagoa bihurtzen ari da.

Ildo honetan, donostiarron beharrekin zerikusirik ez duten hainbat proiektu eta operazio urbanistiko bultzatzen eta inposatzen ari direla salatzen dugu, interes orokorrari eta herritarren ahotsari muzin eginda:

  • Basque Culinary Centerren bigarren eraikina eraikitzen hastea, Manteo parkea suntsituta. Inposaketa autoritario horri gehitzen zaio udal lurzoruaren ondare garrantzitsu bat unibertsitate pribatu bati lagatzea.
  • San Bartolome muinoan merkatal-gune erraldoia jartzeko proiektua, lurrazpiko 4 solairuko aparkalekuarekin.
  • Eraikin historiko esanguratsu eta bereizgarri (Arte Ederren Antzokia, Atotxako Geltokia eta abar) babesik gabe uztea eta eraistea.
  • Etxebizitza legean jasotako baldintzetan Donostia gune tentsionatu izendatzeko urratsik ez ematea. Funts putreak hiritik botatzeko neurririk ez hartzea.
  • Hotelen irekieraren sustapen neurrigabea, Nobu hotelaren arau hausteekin Udalaren konplizitatea, Basquepackers (Arriola kalea) hostelaren irregulartasunen ikuskapen eza, Koisi (Heriz) hostelak bizilagunei eragindako arazoen betikotzea.
  • Igeldon Xabi Alonsoren txaletaren kasuan trikimailu legalen bidez arauak hautsi dituen aldearekin Udala aktiboki lerrokatzea.
  • Belartzako landa gunearen berreskurapena  agindu duten epaiak ez betetzea eta eremu hori betirako suntsitzea dakarten on line merkataritzako multinazionalentzako makro-poligono logistikoaren eta hotel berriaren Belartza2 izeneko egitasmoaren  sustapena.
  • Hirian hain urria den lurzoru naturala, berdeguneak eta zuhaitzak suntsitu eta artifizializatzea. Adibidez, sur-park proiektuak Antondegi inguruarentzat dakarren mehatxua.
  • Metro-pasantearen proiektu zentzugabea bultzatzea, eta bide batez egitasmo horrek Dbus-en izango dituen ondorio kaltegarriak eta obrak eragin dituen diru-xahuketa, segurtasun-fallta eta  espazio publikoari nahiz bizilagunei eragindako kalteak ezkutatzea.
  • Etxebizitza berrien eraikuntza sustatzean alokairu sozialaren eskaintza legezko gutxienekoetara mugatzea eta etxebizitza espekulatiboari lehentasuna ematea.
  • Donostiako hirigintza berrantolatu behar duen Plan Orokor berria arrazoirik gabe atzeratzea.
  • Emisio Gutxiko Eremua kilometro karratu txiki batera mugatzea, eremu turistikoan. Hiriko trafikoa erabat baldintzatzen duten lurpeko aparkalekuak murrizteko neurririk ez hartzea.
  • Alokairu turistikoko pisuen erregulazio ez-eraginkorra eta ikuskapenik eza. Araudi berriaren aurreko pisu turistikoen kopurua gainditzea eta eremu saturatuenak are gehiago saturatzea ahalbidetu duen arauarekin egoskortzea. Etxebizitza negozioa egiteko erabiltzen dutenen interesak lehenestea, gehiengoaren beharraren aurretik, etxebizitza larrialdia bizi duen hirian.
  • Udalak hiriaren elitizazio-estrategiarekin duen konplizitatea, inbertsiogileek hiria bereganatzea erraztuz, luxuzko etxebizitza, turismoa, merkataritza eta ostalaritzarekin aberastuz. Negozio pribatuak interes orokorrekoak balira bezala mozorrotzen dira, eta aurrekontu publikoaren bidez laguntzen zaie.
  • Zuhaitzei buruzko Plan Zuzentzailea idazteko opakotasuna eta atzerapen ulertezina, ale osasuntsuak mozten diren bitartean. Azken-aurrekoa, Errondo pasealekuan
  • Hondakinen kudeaketa txarra, Donostiako hondakinen bereizketa-tasa Gipuzkoa osoko okerrena da.

Donostia Defendatuzen ustez, jarduera kaltegarri hauek denak Udal Gobernuaren politika iraunkorraren erakusgarri dira. Alegia, ez dira arazo puntualak, baizik eta hirian nozitzen dugun arazo orokor eta endemiko baten ondorio eta adibideak. Aurrekontu publikoa eta udal erakundeak sistematikoki interes ekonomiko partikularren alde jarriz, Donostia modu arriskutsu eta atzeraezinean saldu nahi dutenaren erakusle dira.

Horregatik guztiagatik, Donostia Defendatuz koordinadorak:

  • Hirigintza zinegotziari, Ekologia zinegotziari eta alkateari eskatzen die agerraldi publikoa egin dezatela herritarren aurrean, hiri-ereduaren inguruan dituzten kezkei erantzuteko eta erakundeetako arduradunek hartutako erabakien gaineko azalpenak eman ditzaten.
  • Donostiar guztiak gonbidatzen ditu hiri-eredu honen aurkako ekimen eta mobilizazioetan aktiboki parte hartzera.

Herritarren bizitzak erdigunean jarriko dituen hiri-ereduaren alde egiten dugu, eta ez dugu onartzen gure hiriarekin egiten ari direna, asko baita jokoan duguna. Donostia ez dago salgai!

Atxikitako erakundeak:

  1. Altza XXI herri ekimena
  2. Amara Bai auzo elkartea
  3. Ancora
  4. Añorga Txikitarrak auzo elkartea
  5. Ba Gera
  6. Belartza 2 Gelditu
  7. Bidebieta auzo elkartea “Bideak”
  8. Bizilagunekin
  9. CCOO sindikatua
  10. CNT Gipuzkoa
  11. Dendartean
  12. Donostia Bizirik
  13. Egia Bizirik Auzo Elkartea
  14. Eguzki
  15. Erdian Bizi auzo elkartea
  16. Errausketaren aurkako mugimendua
  17. ESK sindikatua
  18. Haritzalde
  19. Heriz plataforma
  20. Herria kultur elkartea
  21. IZBE Intxaurrondo Zaharreko Bizilagun Elkartea
  22. Kaleratzeak Stop Desahucios Donostialdea
  23. Kontenedora
  24. LAB sindikatua
  25. Ondare SS
  26. Osteguna Elkartea / AA.VV. Osteguna
  27. Parkea Bizirik
  28. Satorralaia
  29. SOS Manteo
  30. Steilas sindikatua
  31. Uliako Auzo Elkartea
  32. Uliako Lore Baratzak

Mirakontxako hotelari ehundaka milaka euro irabazten utzi dio Udalak udako denboraldian, arauak betearazi gabe

Hilabeteak dira Donostiako leku zentral eta ederrenetako batean, Kontxara begira, Robert De Niro aktoreak sustatutako 5 izarreko luxuzko hotelaren irekiera iragarri zigutela, bere distira eta ponperia guztiarekin. Ordutik bertako eta kanpoko hedabide ugaritan ikusi ditugu hotel berriaren sustapenerako publi-erreportajeak. Hamaika pertsona, erakunde eta ekitaldi ezagunen izena hotelarekin erlazionatuta aurkitu dugu; turistifikazio elitizatzailearen isla den proiektu honekin lotuta.

Bitartean hiriko bizitza gobernatzeko eta donostiarrak politikoki ordezkatzeko ardurari erantzun behar lioketen erakundeetan jokaera onartezinen kate bat gertatzen ari zen. Turistifikazioaren ondorioei neurria hartzeko ustezko borondatea lau haizeetara zabaltzen duen antzezlaneko aktoreak, udal arduradunak, arauei errespeturik ez dieten negozio milioidunen sustatzaileen konplize izan dira, beste behin. Nobu hotelarekin gertatzen ari dena oso larria da eta arduradun zehatzak ditu.

2023ko urtarrilean, maiatzean, abuztuan eta irailean jaso ditu udalak Nobu hotelaren eraikuntzan ematen ari ziren arau-hausteak agerian jartzen zituzten salaketak. Besteak beste, hotela 2023ko Aste Nagusian zabaldu aurretik, eraikina altuera handiagoan berreraikitzen ari zirela eta baimenik gabeko tximiniak ezarri zituztela salatua izan zen, beharrezko froga grafikoz hornituta. Azaroan hiriko ondare arkitektonikoaren zaintzan eta defentsan diharduen Ancora elkarteak egoera salatzen duen idatzia errejistratu du Udalean eta publikoki aireratu du auzia. Agerian geratu ostean, Udalak hotelaren itxiera agindu du. Ancoraren idatziak oso ondo azaltzen eta dokumentatzen ditu urraketa guztiak.

Baina ondare arkitektonikoaren ikuspegitik egindako txikizioez gain, araudiarekiko jokaera da nabarmentzekoa. Jarduera-baimenik gabe hotela irekita zegoela begi bistakoa zen. Hirigintza sailaren esku zeuden salaketa guztiak eta Hirigintza zinegotzia hotela ireki zuen momentutik jakitun zen baimenik gabe ari zirela. Alkatea berak eta beste hainbat zinegotzik hotelean egindako ekitaldietan parte hartu dute, baimenik gabe zabalik eta negozio egiten ari zen hotelean. Eta jokaera lotsagarri hori ilustratzen duten argazkiak denok ikusi ditzakegu.

Gaia publikoki salatu den arte, hirigintza zinegotziak eta alkateak ez dute neurririk hartu. Eta, berriz diogu, egoeraren jakitun ziren hasieratik. Herritarrak mugitu dira hiriaren interes orokorra defendatzeko, eta horrek soilik behartu ditu udal arduradunak itxiera agintzera. Hirigintza eta lurzoruari buruzko 2/2006 Legeak 225.4.b) artikuluan dio “Erantzukizuna izango dute lurralde-antolamenduan eta hirigintzan eskumena duten toki-erakundeetako kideek eta agintariek, gauza hauek egiten dituztenean: (…) b) Ezkutuko ekintza edo jarduerak eta hirigintzako arau-hausteak ikuskatzeko, babesteko, konpontzeko eta zehatzeko ahalmenez ez baliatzea.”

Oso larria da gertatutakoa. Izan ere, itxiera-agindua abuztuan bertan sinatu zezaketen arren, turismo denboraldiaren garai emankorrenean negozioarekin jarraitzea baimendu diote hotel ilegalari. Kontuan izanda gauek 800 eta 1800€ artean balio duten 20 gelarekin lan egiten duela hotelak, ehundaka milaka euroko diru-sarrerak eskuratu ahal izan dituzte hiru bat hilabetean zehar.

Hotela itxi egin dute oraingoz, ez duelako lehen erabilerarako baimena eskuratu. Diru-sarrera hori eten egin diote. Baina, zigorra eta isuna merezi duten arau hauste larriak egin dituzte hotelaren sustatzaileek: babestutako arkitektura osagaiak nabarmen kaltetu, errejistratutako proiektuari ez jarraitu eta altuera igo, tximiniak ezarri, jarduera gabe aritu… Horrek guztiak isuna merezi du. Baina oraindik ez zaio zigor-espedienterik zabaldu. Hirigintza eta lurzoruari buruzko 2/2006 Legearen 226.4. artikuluak dio “Arau-hausteak inola ere ezingo dio ekarri onura ekonomikorik arau-hausleari. Beraz, arau-haustea egiteak onura ekonomikorik ekarri badu edo badakar, lortutako onura ekonomikoaren guztizko zenbatekoa gehituko zaio zehapen ekonomikoari”. Zigor handiak jaso beharko lituzke, beraz, Nobu hotelak, hirigintza araudiari erreparatuta.

Salatzen dugu Udalak utzi egin duela arau hauste hau gertatzen. Informazio guztia eskura izan arren, Nobu hotelaren delituekin konplizitatez jokatu duela.

Salatzen dugu hotelaren sustatzaileen aldetik, Mirakontxa erdian, babestutako eraikin batean, honela jokatzeak donostiarroi errespeturik ez izatea dela. Herritarroi barre egiten saiatzea da.

Larria bezain tristea izan arren, Udal arduradunek luxuarekin eta glamourrarekin txundituta jokatzen dutela da hipotesirik baikorrena. Edozein kasutan, donostiarron interesak bigarren mailan utzi dituztela, behintzat, agerikoa da. Ez da lehenengo aldia turismo jarduerarekin lotutako negozio proiektuetan ikuskapen faltarekin batera gertutasuna publikoki agertzen dutena.

Eskatzen dugu Udalak hotelaren sustatzaileei egindako arau hauste guztiekiko neurriko zigor ekonomikoa ezartzea: hilabete hauetan ilegalki eskuratutako diru-sarreren kopuruaz gain, ondareari egindako kaltea eta balizko lehengoratzea estaliko dituena, gutxienez.

Eskatzen dugu Udalak aurrerantzean arau guztiak betetzen dituela frogatu eta bermatu arte ez baimentzea inongo negozio-proiekturi jarduerarik; ez ofizialki, ez de facto.

Dei egiten diegu donostiarrei gure hiria eta gure bizitzak kaltetzen dituen turistifikazioaren aurka aktibatzeko eta antolatzeko, denetariko elkarte eta ekimenetan parte hartuz. Donostia berreskuratu behar dugu turismo jarduerarekin aberasten ari direnen eskuetatik eta beren mesedetan gobernatzen dutenengandik. Donostia desazkunde turistikorantz bideratzea premiazkoa da.

2023.10.22 – Testua eta argazkiak

MANIFESTAZIO AMAIERAN IRAKURRITAKO TESTUA:

Eguerdi on,

Gutxi batzuen etekin gosea kalte handiak eragiten ari da hiri eta lurralde askotako biztanlerian. Mundu osoan hamaika talde ari gara turistifikazioaren kontra, bizilagunen eskubideak, gure lurraldeak eta gure bizitzak defendatzen elkarte eta taldeetan antolatuta.

Urria hasieran “Turismo Gastronomikoaren Mundu Foroa” egin zen hemen, Kursaalean. Bihartik aurrera, berriz, Turespaña konbentzioan bilduko dira turistifikazioa gidatzen duten erakunde publiko eta pribatuak. Ekitaldi hauek gure hirian egitea ez da kasualitatea. Azken urteetan turismoaren jardueraren bidez negozioak egiteko gune bezala nabarmendu da Donostia. Turistifikazioari “barra libre” eman zaionez, hiriak inbertsiogile, multinazional, espekulatzaile, esplotatzaile, oportunista eta putreak erakarri ditu.

Izan ere, azken urteetan ikusi ditugu kaleak betetzen, hiri-espazioa turismo-negozioen mesedetan eraldatzen, prezioak garestitzen, auzoak bizitoki bezala zailtzen eta bisitaleku soil bihurtzen, etxebizitzak ordaindu ezinezkoak izatera pasatzen, natur guneak atrakzio gisa erabiltzeko proiektuak, merkataritza txikia hilzorian, ondare arkitektoniko eta kulturala arriskuan, euskara apaingarri huts izatera bultzatua eta ehundaka edo milaka donostiar, beren bizi proiektua bertan gauzatu ezinik, kanporatuak izan direla.

Donostiaren turistifikazioa ez da zerutik erori; erakunde publikoak turismoaren negozioarekin aberasten direnen esanetara daude. Turismoaren hazkundeak eragindako kalteak ukatzen zituzten, hasieran. Donostiarrak erabat kezkatuta eta gogaituta daudela ikusi dutenean, ordea, antzerkiari ekin diote. Turismo jasangarriaz mintzo dira, neurriak hartzen ari direnaren errelatoa egin beharra sentitzen dutelako orain. Ez da sinesgarria. Pisu turistikoen eta hotelen irekiera erregulatu dute, gehiago ireki daitezen ateak zabalik utziz. Tasa turistikoaren inguruan bueltaka jarraitzen dute, ezkutatuz zertarako baliatu nahi duten bildutako dirua eta aitortu gabe ez lukeela turisten etorrera gutxituko. Desestazionalizazioa eta deszentralizazioa saldu nahi dizkigute formula magiko bezala; baina turismo masiboa auzo guztietara eta urte osora zabaltzea eragingo dute horrekin. Hipokrisia eta faltsukeria ariketa bizi dugu. Donostiarron haserrea baretzeko operazioa da. Baina turismoaren pisua gutxitzeko neurri eraginkorrik ez hartzeko estrategiari eusten diote. Horren erakusgarri lehengo astean Japoniara egindako bidaia.

Turismo jarduerak hirian gehiegizko bolumena eta pisua hartu du. Desazkunde turistikorantz bideratu ezean, sortzen dituen kalteek handitzen, iraunkortzen eta atzera ezinezko bihurtzen jarraituko dute. Promozio turistikoa zerora murriztu behar da; etxebizitzaren alokairuen prezioak mugatu; pisu turistiko eta hotel gehiago irekitzeko aukerak ezabatu eta gaur egungoak murrizteko prozesua abiatu; ondare natural eta arkitektonikoaren babeserako neurriak indartu behar dira; espazio publikoa bertakoen bizitzen beharretara egokitzeko eraldatu; auzoetako bizitza komunitarioa sustatzeko politikak gauzatu behar dira…

Erakunde publikoei eskatzen diegu herritarrei hitz egiten uzteko eta adi entzuteko. Turismoaren eraginen gaineko eztabaidari ateak zabaldu behar zaizkio. Marra arriskutsu bat gainditu dugula onartu behar dute. Eta donostiarron bizi baldintzak babesteko, desazkunde turistikorantz trantsizio prozesua abiatu behar dugu. Adostutakoa eta progresiboa, baina irmoa aldi berean.

Donostiarrak kokoteraino gaude eta hiri eredua aldatu nahi dugu. Ez etsi, lagunok! Ez bihurtu ikusle pasibo- Dena ez dago galduta. Dena ez da hauteskundeetan jokatzen. Gure hirian eta gure bizitzez ari gara. Donostia salduz aberastu nahi dutenak geldiarazi behar ditugu. Bildu gaitezen hiri eredu desorekatu eta bidegabe honen aurrean piztu diren borroketan, auzogintzan eta turistifikazioari erantzuten. Gehiegi da jokoan dagoena, galtzen uzteko.

Animo eta aurrera! Turistifikazioari stop! Donostia ez dago salgai!

https://www.naiz.eus/eu/info/noticia/20231022/donostian-turismo-desazkundea-martxan-jartzeko-aldarrikatu-dute-herritarrek

https://www.noticiasdegipuzkoa.eus/donostia/2023/10/22/donostia-bizilagunekin-denuncia-danos-genera-7416399.html

https://www.eitb.eus/eu/albisteak/ekonomia/bideoak/osoa/9338074/bideoa-desazkunde-turistikorantz-abiatu-beharra-aldarrikatu-dute-ehunka-lagunek-donostian/

https://www.eitb.eus/es/noticias/economia/videos/detalle/9338052/video-cientos-de-personas-reivindican-en-san-sebastian-decrecimiento-turistico-de-ciudad/

https://amp.antena3.com/noticias/economia/vecinos-san-sebastian-huelga-stop-turistificacion_2023102265355b8832dc750001b3ceaa.html

https://www.lavanguardia.com/vida/20231022/9319951/manifestacion-pide-turismo-mejores-condiciones-vida-san-sebastian.html

https://www.cope.es/actualidad/economia/noticias/una-manifestacion-pide-menos-turismo-mejores-condiciones-vida-san-sebastian-20231022_2961604

https://www.europapress.es/euskadi/noticia-manifestacion-denuncia-san-sebastian-danos-genera-turistificacion-ciudad-20231022173503.html

https://irutxulo.hitza.eus/2023/10/23/desazkunde-turistikoa-aldarrikatu-dute-donostiako-kaleetan-zehar/

https://www.argia.eus/albistea/turistifikazioaren-aurkako-manifestazio-jendetsua-egin-dute-donostian

https://www.rtve.es/play/videos/telediario-fin-de-semana/15-horas-22-10-23/6995025/ (37:35)